Anne Mette, 29-nik ukiulik, eqqarlerisaq

Læs fortælling på dansk 

Suli inunngornanga ataataga imertalerpoq, taamaattumik uanga pisuussuteqanngilanga.
29-nik ukioqarpunga aatsaallu massakkut inuunera pitsaanerusumik ingerlatilerlugu.
22-nik ukioqalernissama tungaanut iliuuseqartoqanngilaq, taamanili psykiateri ataaseq, tarnip pissusaanik immikkut ilisimasallit pingasut, psykoterapeuterillu sisamat oqaloqatigisimavakka.
Ilaat iluaqutaalaarsimapput, allat iluaqutaavissimanatik ikittuinnaallu annertunerusumik iluaqutaasimallutik.
Tarnip pissusaanik immikkut ilisimasalik ataaseq suli ilaatigut ornittarpara, taassuma tunissummik annertuumik tunisimavaanga. Akeqanngitsumik oqaloqateqarsinnaaneq!
Tupinnaqaaq inoqarmat taamatut annertutigisumik uannut ikiuerusuttumik.
Suli paasisinnaanngilara, kisianni tamanna uannut annertoorujussuarmik naleqarpoq.

Inuunera tamaat ataatama atuarfimmilu meeqqat paasitittuarsimavaannga pualasunga, sianiittunga pinniittungalu.
Ataatannit ima oqarfigitittarpunga "nagguaatsorsuaq".
Nerisassanik atornerluisuuvunga, soorlu sikunik, kaaginik mamakujunnillu.
Sukkasoorujussuarmik nerisassanik ajornartorsiuteqalerpunga, piffissamilu tassani nerisassat tuppallersaatigisarpakka. Tamassuma kinguneraa inuunera tamaat pualasuujusimanera, sulilu 15 kilo-nik oqimaappallaarnera.

Inuusuttuaranngulernera ajornerpaavoq.
Atuarfimmi assut qinngasaarneqartarpunga, angerlaraangamalu ataatannit eqqarsartaatsikkut naalliutsinneqartarlunga.
Aatsaat 19-nik ukioqarlunga angajoqqaakka qimammata eqqissititaagallarpunga.
Ukiuni 22-ini kammalaatigisimasara aammalu nipilersortartut nuannarisakka pigisimanngitsuugukkit ullumikkut immaqa maaniissimanavianngikkaluarpunga.
Taamanikkut anaanaga qanilaartumik attaveqarfiginngilara, immaqa sumiginnarneqartutut misigisimanera pissutaalluni. Kisianni ullumikkut qanilaarnerulernikuuvugut, suna tamangajaallu pillugu oqaloqatigiissinnaalernikuulluta.
Ikinngutiginerpaasakka, atsaga ikinngutikkalu allat eqqaassanngikkaanni anaanaga inuuninni pingaarnersaavoq.

Ukiut marluk matuma siornatigut ataatannut attaveqarunnaarnissannut nukissaqalerpunga, taamaallaat sianernerit ataasiakkaat ataatamalu allagai aqqutigalugit attaveqartalersimavugut.
Paasinikuuara qaquguluunniit ataataqalernaviarnanga aammami ataataqanngisaannarsimavunga. Akiuunneq sakkortullunilu sivisusimavoq aammami suli qaangiutinngilaq.
Immaqa qaangiutinngisaannassaaq kisianni siuninni qaamaneqarpoq aamma upperivara siunissami sapinngisara malillugu pilluarnerulerumaarlunga.
Neriuutigaara imigassamik aanngajaarniutinillu allanik atornerluineq ammanerusumik oqallisaasinnaalerumaartoq. Neriuutigaara meeqqat atuarfimmi ikiorneqarsinnaalerumaartut, uangami atuarfimmit ikiorneqarnikuunnginnama.
Saqqummerlusi, ajornartorsiutit oqaluuserinissaat annilaangaginasiuk.
Iliuuseqarsimanersi nuannaarutigilerumaarparsi.
Akiuutigitsi inuunersilu uterteqqillugu.

Siunissinni qaamaneqarpoq.

Skriv din livsfortælling

Du kan også få din egen livsfortælling med på Hope. Læs mere om, hvad du skal gøre for at komme med.

Annerusumik atuarit