Jannie 2, 39-nik ukiulik, eqqarlerisaq

Læs fortælling på dansk 

Meeraaninni takorluukkat

Ataataga ajunngilaq, kisianni imerajuttuunerup silarsuaanit aniguiniarnissaminut nukissaqarsimanngilaq.
Piffissap ingerlanerani paasiartulersimavara ataatama iliuuserisarsimasai pissusilersuutigisarsimasaalu eqqumiitsut ajortumik isumaqarluni iliuuserisarsimanngikkai, kisiannili piviusoq unaasoq, meeqqat imerajuttullu inuunermi ingerlaqatigiissinneqarsinnaanngillat.
Imigassap asanninneq ajugaaffigisarpaa - ajoraluartumik - qanorluunniit asanninneq annertutigigaluarpat.
Uangali meeraagama tamanna naluara.

Qaavaniit naqqanut

Ataata takkuppoq, ataata ingerlavoq, ataata toquvoq.
Amerlanertigut meeraanera taamatut eqqaamavara.
Inuuneq allanngoratuartoq upperiuminaatsorlu
Nalornineq qanorlu pisoqarsinnaaneranik annilaanganeq aammalu aqagu ullup qanoq ittuunissaanik nalornineq ajornersaapput.
Taakku nalornissutaajuaannartarput.
Pisut takkuttut ataasiakkaarlugit ingerlanniartarsimavakka, avatangiisimalu qanoq inneranik maluginiaaneq aamma ilikkarsimallugu.
Taamaalillunga aamma naluneq ajorpara illarfissanngornersoq, qiaffissanngornersoq, oqaluffissanngornersoq imaluunniit nipangerfissanngornersoq.
Suna tamarmi tassanngaannartumik pisarami.
Tassanngaannaq ingerlasussanngortarpugut, tassanngaannaq uterluta, tassanngaannaq....
Eqqaamasat ersarippallaanngillat.
Anaana qiasoq tusaasinnaavara, inuit nikallungasut annilaangarpasittut nipikitsumik isussuppalungajattumik oqaluttut.
Uniffeerunneq.
Silaannaq aliasuffiusoq toqqissisimananngitsoq.
Inersimasut oqaluuserisaat paasisinnaanngilakka.
Kisianni tassanngaannartumik biilinut ikivugut aanaamut aataamullu biiliunneqarluta.
Toqqissisimanarlunilu kissalaartuaannarpoq kisianni anaana ataatalu ernumagivakka, angerlarsimanngikkumami paarisinnaanngilakka.
Suna tamaat sakkortuutut eqqaamavara.
Qaarpiaanut ingilluta nuannaanngikkutta, naqqarpiaaniissaagut.
Qilak tungutsarissoq imaluunniit qasertuinnaq.
Akornaniittoqarneq ajorpoq aamma nalusarpara qaqugukkut seqineq nuissanersoq qaqugulu tarrissanersoq.

Malinnaaginnartarpunga, allanngortoqaleraangallu tamatigut ersisarlunga.
Eqqaamasarpara ambulance illutta silataanut unikkaangat, angutillu uniforminik atisallit ataata kissumiartaammut ilillugu aagaangassuk, uangalu anaanap talia tigullugu ataatamut aalaterigaangama ambulance tarrikkiartortoq isigalugu, tammartaraarlu.
Qialeruma qialeruma ataatama annaanissaa annilaangagalugu. Suli eqqaamasarpara anaanaga qiviarlugu aperigaangakku uanga pisuussuteqarnerlunga?
Oqarfigisarpaanga uanga pisuussuteqanngitsunga. 
Taamaakkaluartorli iluamik upperineq ajorpara.
Ataata napparsimavoq, sunaana taamak eqqumiitsigisoq nappaatigigaa?
Eqqaamasakka malillugit sorluluunniit ukiorpassuarni ullut allortarlugit ambulance-nit aaneqartartoq kisianni immaqa tamanna pingasoriaannarluni pisimavoq.
Uannulli assut puigunaatsutut tamanna inississimavoq.
Allat ataataat uanga ataatattulli napparsimanngillat, taamaattumik ataatap nappaataa  naliginnaasuusimanavianngilaq?
Ataata qalianiikkaangat isumaqartarpoq ataata napparsimalersimasoq.
Suna nappaatigineraa paasisinnaasimanngilara.
Ataasiarlunga napparsimasoq aperinikuuara.
Akisinnaanngilaanga kisiannili meeraaqqatut ililluni qissaserluni.
Ataata taamaanneq ajoraluarpoq.
Ataata angisuujuvoq, nukittooq, pitsaasoq, sukangalaartorlu.
Arfininngornikkut nalunaaqutaq arfineq-pingasunut eqqiaaneq, unnukkut arfinermut nerineq.
Ataata napparsimanngikkaangat ajortoqarneq ajorpoq.
Taamaattumik aamma eqqumiittarpoq tassanngaannartumik nukillaaginnarluni innangaleraangat, umiminut nuakoorluni, taamanilu uannut nassuiaanneqarsinnaanngitsumik tipeqaleraangat.
Tipi, imaluunniit tipik, tujorminartoq ataatap napparsimaneranut uannut eqqaasitsiuaannartoq. Silaannaq oqimaangaarmat soorlu silaannaq toqunartoq.
Tipi taanna puiaasaaqqallu qorsuit takkukkaangata ajortoqalerneranut ilisarnaataasartoq ilikkarpara.
Taamaattoqartillugu ullup siuliani qanoq ajunngitsigisimagaluarnerput soqutaajunnaartarpoq.
Suna tamarmi soqutaajunnaartarpoq.
Suna tamarmi minutsit tallimat ingerlanerani mumisinneqartarpoq. 
Nalusarparalu qaqugu tamanna pissanersoq.
Qanorluunniit ataatamut pitsaatigigaluaruma naalatsigigaluarumalu tamanna aamma pisarunarpoq.
Inuusakka bamsiutikkalu ininni pinnguarisarpakka.
Ullut arlaanni ataata angerlarsimanngitsoq - napparsimavimmiittoq - bamsit ilaat "Ataata"-mik atserpara.
Attuuarujoorpara, innartillugu atuffallugulu.
Aliasukkaangat tuppallersartarpara eqerujussuarlugu.
Mamartunik nerisittarpara oqaluttuullugulu qanoq erligitigalugu.
Sivitsunngitsorlu "Ataata" peqqisseqqittarpoq.
Tamanna uannut neriuuteqalersitsisarpoq, ataatap napparsimajunnaartissinnaaneranut annaassinnaaneranullu eqqarsalersitsisarluni.
Ataata napparsimajunnaarsimalluni napparsimavimmiit angerlaraangat suna tamarmi ajorunnaarsimanissaanik eqqarsalersitsisarpoq - uanga taamatut eqqarsartarnikuuvunga.
Upperilluinnarsimavara taamatut iliuuseqarnera ilaqutariittut ajunngitsutut nuannaartutullu inuuneqalersitsisinnaassasoq.
Soorlu ilaqutariit allat ataatartallit.
Qaavatigut: Aap, kisianni ilukkut tupatsinneqarujussuarpunga.
Tamanna pillugu pilluarnerulinngilanga.
Ajortorujussuuvoq ataatallu napparsimaneraniit pitsaanerunanilu toqqissisimanarnerunani - allatorluinnaq.
Tassanngaannartumik sunaluunniit oqaluuserineqaqqusaajunnaarpoq.
Nipangersimanissamut piffissanngorpoq, illup iluani seqummakut misigissutsigullu seqummakut pillugit oqaaseqartoqanngilaq.
Kiinnat, nipit silaannarlu tamarmik nukillaangallutillu oqimaapput.
Suna tamarmi tassanngaannartumik ajorunnaarpoq.
Ataata napparsimajunnaarpoq.
Qungujulaffissanngorpoq ilukkullu anniaatit tamarmik puigugassanngorput. Ataata ajornani uterpoq, inissaqarniassammallu uagut illukartitertariaqarpugut.
Uannut nuanniik. 
Sumiginnarneqartutut takuneqanngitsutullu misigisimavunga.
Ataatap inuuneranik annaassiniarnermi tassa qujassut!
Ulloq manna tikillugu nipangersimaneq tujorminartoq sapingajattarpara.
Anersaartorpalunnerup nererpalunnerullu nipai imaqanngitsut, kiinnallu nipangersimasup iluani eqqarsapiloorneq.
Timiga tamarmi annernarpoq.
Ilunni suna tamarmi sajuttuinnaavoq, misigisimavunga nipangersimanerup kipitinneqarnissaanut akisussaasuullunga.
Ataataga ukiut qulit matuma siornatigut toquvoq - 14-nik ukioqarlunga - nappaatinilu toqqutigaa - taamani paasivara imerajuttuuneq nappaatigisimagaa.
Naamik, annaassinnaasimanngilara.
Taava aliasunneq pakatsinerlu takkupput, naak uanga annakkusullugu sivisuumillu ataataga peqqitsillugu inooqatigerusullugu sorsukkaluarlunga toqusimammat.
Angut nuannersoq nukittoorlu. 

 

Ataatamiit animut

Pisut akueriniarsarileruttornerisa nalaanni, ataataqarnangalu inuunissara suliareruttulernerani, pisartut "eqqumiitsut" aallarteqqipput.
Tipi taanna, silaannaq taanna, annilaanganeq taanna.
Tamatumuuna anima nappaat eqqumiitsoq nappaatigilersimavaa. Nappaat immiaaqqanik amerlasuunik napparsimalernissap tungaanut imernermik, eqqumiitsumik nipiliornermik qianermilluunniit ilisarnaatilik.
Anip annaanissaanut ernumaneq annilaanganerlu annertusiartortillugit inuuninni nutaamik suliassaqalerpunga. Aniga annaakkusuppara.
Upperilluinnarsimavara anip inuunera ilaqutariillu sinnerisa inuunerat uanga akisussaaffigalugit - uanga kisima.
Uanga ilaqutariit iluanni nukittunngikkuma, sapiisinngikkuma, pikkorissuunngikkumalu taava qanoq tamatta kinguneqassaagut?
Ukiorpassuarni eqqarsartarsimavunga uanga pisuullunga ataataga qatanngutigalu imerajuttuusut.
Iluamik takusinnaasimanngilara kina alla pisuussagaluarnersoq.
Soorunami tamanna iliuuserisama pitsaanngisaannarneranik kinguneqarpoq.
Nalusimavara sugaluarumaluunniit, qanorluunniit oqalukkaluaruma, iliuuseqaraluaruma, "Mount Everest" qaqigaluarukku qaqqarsuullu qulaaniit nunarsuarmi eqqissineqarnissaanut oqalugiaraluarumaluunniit imerunnaartoqarsimanavianngikkaluartoq.
Uangali tamanna naluara.
Ataatap toqoreernerata kingorna imminut aperisarsimavunga ataatap nalusimannginnerlugu qanoq asatigineriga.
Immaqami arlaleriarlunga oqarfigisarsimasuugukku asallugu ullumikkut suna tamarmi allatut isikkoqarsimassagaluarpoq, immaqa suli taava uumasimassagaluarpoq.
Taamatullu eqqarsaatit ingerlarsortuarput, naggataatigullu nunarsuarmi ajornartorsiutinut tamanut akisussaasutut imminut pisuutilertarpunga.
Tassa taanna pisunut akissutissatuaq.
Nunarsuup annaannissaa sinnatorisarsimavara, naggataatigulli sinnattuinnaajunnaarluni uannut inuttut akisussaasutut misigisitsilerpoq.
Kingusinnerusukkut paasivara ataatap qanoq asatigineranik qasseriarlunga oqarsimanera, immiaaqqallu amerlassusaat, qaqqarsuarnullu qaqisisimagaluarumaluunniit allanngorsimanavianngikkaluartut.
Kisianni tamanna paasissallugu ukiorpassuit atorsimavakka, immaqa ukiut suli taamatut amerlatigisut atorlugit timinniittut suliarillugillu piiassavakka.

 

Annaassisussamiit inuinnarmut

Piffissaq qasunartoq uteriinnerlu qaangereerlugit siumut ingerlajartuaalerpunga. Kigaatsunnguamik akueriartulerpara immaqa ataataga, qatanngutiga imaluunniimmi nunarsuaq tamaat annanniassallugu uanga suliassarinngikkiga.
Ukiorpassuarni sugaluarumaluunniit allannguisinnaannginnera, pisut uannut attuumassuteqannginnerat, ikiuisinnaannginneralu akueriniarsarivakka.
Uanga kisima sorsuunnissannut aammalu uanga kisima suliassattut eqqarsaatit sungiutereernikuugakkit tamanna assut assorujussuaq akueriuminaappoq.
Ilunni annertuumik imaarutsitsivoq.
Piffissaq, eqqarsaatikkalu allanik immernissaat ilikkarniarsarilerpara.
Naatsumik oqaatigalugu, uanga nammineq inuunera inuussallugu sungiunniarsarilerpara.
Aap, qujanaq", aallaqqaammut taamatut eqqarsartarpunga, taamaalereeraangamalu uannut ajoqutaaginnartunik eqqarsaatit misigissutsillu takkussuutilertarput.
Puigugaaneq, sumiginnagaaneq, sianiinaartinnerlu kamassutigalugillu pakatsissutigalugit.
Kiap aamma naatsorsuutigissagamiuk uanga nammineq inuunera ingerlatilissagiga kialluunniit taamaaliornissannut ilitsersuunnikuunngippanga?
Tamanna ilutigalugu inuuninni angutit pingaarutillit marluk - Thomas aamma ataata - pillugit taamatut kusanaatsigisumik eqqarsarnera kanngusuutigilertarpara.
Taamaattumik ajoraluartumik misigissutsikka amerlanerit ilunniiginnartarput.
Paatsiveeruterujussuarlunga.
Sinnattoriuagara aammalu annaassisussatut inissisimarusunnera iperarusunnagu.
Avataaniilli oqarfigineqartuarpunga  "Jannie, inuuninni illit taanna suliassarinngilat".
„Jannie, inuk alla annaanneqarsinnaanngilaq".
„Jannie, ikiorneqarusunngitsoq ikiorneqarsinnaanngilaq".
„Jannie, illit pisuussutiginngilat". Ilaalu ilanngullugit.
Aallaqqaammut inuit taamatut oqaluleraangata assut kamallungalu nukillalaajummertarpunga.
Soorlu oqarfigineqarlunga ullumikkut suna tamaat kukkusumik ingerlassimagiga, inuuninni minutsit tamaasa kukkusumik ingerlassimagikka.
Taamatorluinnarmi imminut "perorsarsimagaluarpunga".
Oqarsinnaavugut ukiut 18-it sunniipilussimanerit paasiniartariaqalissagikka.
Inuunerat ingerlatissanngikkukku, napparsimajunnaartillugit, nunarsuarlu annaallugu - taavami sussagama?
Immikkut inissinneqartutut misigivunga assullu atorfissaarunnera anniaatigalugu.
Nunarsuummi annaannissaa sinnattorisimavara.
Aap, ilaqutariit iluanni annaassisussatut imminut takorloorsimavunga, aviisillu saqqaat takusinnaalereeraluarlugit "Niviarsiaqqap ilaquttani annaappai".
Annaassisutut imertissaarlugit napparsimatissaarlugillu, taava suna tamarmi iluarsissagaluarpoq, inuunittalu sinnera pilluarluta inuulissagaluarpugut!
Ullumikkut oqaaseq taanna atuassallugu annernarpoq, sulilu eqqaamavara taamatut oqarnera eqqarsarneralu.
Kisianni taamatut uanga inuunera annaanniarsimavara.
Taamatut nunarsuarmut nuannersumut anniarfiunngitsumullu, ilaqutariillu aserorneqannginnissaannut neriuummik tunisisumut sinnattuaqisarsimavunga.

 

Takorluukkamiit piviusumut

Inuunera nammineq ingerlattussanngorpara - imaluunniit allatut oqaatigalugu, inuuneq sunarpiaanersoq paasiniartussanngorpara.
Kigaatsunnguamik misigissutsikka tamaasa aqqusaartorpakka, amerlanertigullu - qangatut - nuannaarujussuanngikkuma aliasorujussuartarlunga!
Inuunera pisoqarfiusoq nuannaarnerlu avammut takutittuaannarpakka, annernartullu kisimiilernissannut toqqortarlugit.
Ilaquttakka piffissami aalajangersimasumi timikkut misigissutsikkullu ungasilligallarpakka, taamaalillunga suna tamaat avataaniit isigalugu misiginissaanut imminut periarfissillunga - soorlu filmimi imaluunniit isiginnaartitsissummi isiginnaartitsisartut tamarmik immikkuullarissuusarnerat, naggataatigullu suna tamaat ataqatigiissilerlugu pilluarneq nassaarisaraat.
Tassani suna tamaat takusinnaalerpara!
Ilaqutariittut inuunerput, ataata kingusinnerusukkullu Thomas pingaarnertut inuttaralugit suliaavoq.
Suna tamarmi taakkununnga tunngasimavoq - napparsimagaluarpata peqqikkaluarpata, kamakkaluarpata nuannaaraluarpata - uagut sinneruttugut malinnaaginnartarpugut pissusaannullu naleqqussarluta - ilaatigut nalusatsinnik allatut iliuuseqarsinnaasarpugut.
Suna tamarmi ersarissivoq - uanga qaratsanni. Misigissutsikka suli angummanniarsaripput - paasilerparalu ilikkagassama sakkortuup tullia takkutilersoq - Ikiortissarsiorsinnaaneq!
Nalunngilara ilunni suna tamarmi paatsiveerunnersuaqarluni ikumasuinnaasoq, kisianni nalulluinnaqqissaarpara qanoq aamma sooq ikiortissarsiussanerlunga.
Tamanna meeraallungali annaassisussatut takorloortarsimasannut tulluutinngilaq. Annaassiniartussarmi ikiortissarsiorneq ajorpoq.
Misigivunga inuunima naqqanut pillunga.
Imminut annaannissannut nukittunngitsunga, inuillu piumasaqaataat uannut piviusunngortissinnaanngikkikka paasineqarpat, taava inuit pakatsiserujussuassavakka.
Suna tamarmi nakkaatissagaluarpoq.
Suna tamarmi ulorianartorsiorpoq!
Taamatulli eqqarsarnera uanga nammineq niaqunniippoq. Ukiulli ingerlaneranni takorluuisarninni tamakkua upperilersimavakka.
Uannut piumasarineqartutut isigisakka nammineq pilersissimavakka.
Takorluukkat eqqarsaatillu taakkua kigaatsunnguamik iperariartuaartussanngorpakka.
Taamaaliorsinnaanissannullu ikiorneqartariaqarsimavunga - tamannalu pakatsissutigineqarnanilu kamassutigineqanngilaq!
Rom-ili ulloq ataaseq sananeqanngilaq.
Ulloq manna tikillugu imminut annikigisarpunga, imminut piumasaqarfigivallaartarlunga. Annaasaqarnissaq suli annilaangassutigisarpara aammalu suli angutit tamarmik imerajuttuunnginnerat upperilerniarsaralugu.
Kiisalu aamma uannut attuumassuteqanngitsunik sunilluunniit akisussaaniartarneq naalliunnartoq.
Suli ilaatigut timima sungiutiinnarsimallugu taamaalioqqusarpaanga. Soorlu ataata, Thomas imerajuttullu allat inuuneq oqimaalligaangat eqqarsariarnatilluunniit timikkut sungiutiinnarsimallugu imilertartut. Soorlu qatanngutima inuunermi sinnera imernaveersaarnissani suliarisussaagaa, uangattaaq immaqa aamma inuunera naallugu allatut eqqarsartalernissaq pissusimalu allatut ineriartortinnissaa suliassaraakka. Kikkut tamarmik pitsaanerpaamik iliuuseqarput.
Tassa taamaappoq - kisianni inuunerup sinnera taamaattariaqanngilaq.
Tamanna uanga nammineerlunga massakkut aalajangersinnaavara.

Skriv din livsfortælling

Du kan også få din egen livsfortælling med på Hope. Læs mere om, hvad du skal gøre for at komme med.

Annerusumik atuarit